Обвинувањата за злоупотреба на синдикатот се насочени кон раководството на ССМ и неговите бенефиции
ВМРО-ДПМНЕ излезе со сериозни обвинувања за злоупотреба на синдикатот, посочувајќи дека раководството на ССМ го претворило синдикалниот систем во алатка за лично богатење.
Партијата тврди дека раководните структури, наместо да се борат за работничките права, остваруваат високи примања и лични привилегии, додека во јавноста говорат за минимална плата и сиромаштија.
„Синдикалната активност ја претворија во профитабилен механизам. Тие не се борци за права, туку луѓе кои водат организација како приватна фирма со дебели плати,“ се наведува во соопштението на ВМРО-ДПМНЕ.
Во обвинувањата се спомнува и Слободан Трендафилов, за кого партијата вели дека има годишни примања кои надминуваат 1.6 милиони денари
- „Трендафилов, додека зборува за минимална плата, секој месец зема износ што е неколкукратно поголем. Тоа е лицемерие. За народот минималец, за него максималец,“ истакнува партијата.
Дополнително, во соопштението се споменува и Васе Депонова, претседателка на Синдикатот на поштенски и телекомуникациски работници. Според информациите што ги доставиле, таа инкасира 794.000 денари на годишно ниво.
„И Депонова, исто како и Трендафилов, е дел од синдикалната мрежа што функционира за личен ќар. Тие зборуваат за минимални плати, а си обезбедуваат сериозни репрезентации и бенефиции,“ се додава во соопштението.
Од ВМРО-ДПМНЕ посочуваат дека обвинувањата не доаѓаат само од нив. Според партијата, сè повеќе членови на синдикатот стануваат свиркачи, споделувајќи информации за однесувањето на раководството кон ССМ како кон „сопствена компанија“.
„Злоупотребата на синдикатот веќе не е тајна. Работниците сфатија дека овие луѓе не се нивни заштитници, туку профитери зад параванот на синдикализам. Трендафилов и неговиот круг се дел од шема што ја руши довербата во синдикалната борба,“ наведува партијата.
На крајот, ВМРО-ДПМНЕ порачува дека СДСМ стои зад ваквото раководство, и додава дека јавноста веќе ги препознава вистинските мотиви зад јавните настапи на дел од синдикалните водачи.