НПМ утврдил сериозни неправилности во психијатриската болница
При контролата на психијатриската болница „Демир Хисар“ во декември 2025 година, тимот на Националниот превентивен механизам при Народниот правобранител затекнал околу 20 осудени лица кои, според наодите, не страдале од психичка болест, туку преку спорни психијатриски вештачења избегнале издржување затворска казна.
Ова денеска го соопшти заменик-народниот правобранител Соња Трифуновска, при презентацијата на извештајот на НПМ. Таа посочи дека, поради сериозноста на утврдените состојби, НПМ се обратил и до Комората на вештаци, со барање информации за примената на етичките и професионалните стандарди во судско-психијатриските вештачења.
Персоналот бил изложен на притисок, закани и безбедносни предизвици
Според Трифуновска, ваквата состојба предизвикува сериозни проблеми во функционирањето на Форензичкото одделение во болницата. Здравствениот персонал, покрај терапевтската работа, бил принуден да презема и безбедносни задачи.
Од НПМ посочуваат дека лицата кои не се вистински пациенти често ги вознемирувале и злоупотребувале останатите пациенти, организирале бегства, а вработените биле изложени на закани и сериозен професионален притисок.
„Се отвора прашањето за сериозно отстапување од целта на кривичноправниот систем и суштинско поткопување на принципот на еднаквост пред законот“, предупреди Трифуновска.
Чести промени на директори и влошени услови за вистинските пациенти
Во извештајот се наведува и дека во периодот од 2024 година до посетата на НПМ, во болницата биле сменети четворица директори, што дополнително влијаело врз функционирањето на установата.
Според НПМ, ваквата состојба директно ги погодува вистинските психијатриски пациенти, кои поради преоптовареноста на персоналот добиваат помалку внимание и се лекуваат во влошени услови.