Министерот за транспорт и вицепремиер Александар Николоски денеска информираше дека во Владата била остварена значајна средба со амбасадори од УНЕСКО, на која се разговарало за приоритетите на Македонија во делот на заштитата и одржливиот развој на природното и културното наследство.
„Денеска во Владата остваривме значајна средба со амбасадори од УНЕСКО, на која разговаравме за приоритетите на Македонија во делот на заштитата и одржливиот развој на нашето природно и културно наследство“, посочи Николоски.
Фокус на Охридското Езеро и охридскиот регион
Во објавата, Николоски нагласи дека е потребна силна меѓугранична соработка со Албанија, особено во делот на заштитата на Охридското Езеро и охридскиот регион.
„Природата не познава граници и потребно е заедно да ја чуваме“, истакна Николоски.
Посебен акцент, како што наведе, бил ставен на развојот на охридскиот регион, во кој припаѓаат општините Охрид, Струга, Дебрца и Поградец во Албанија.
Автентичност и одржлив развој за идните генерации
Николоски посочи дека заедничката определба е да се зачува автентичноста на регионот, а истовремено да се обезбеди одржлив развој во интерес на граѓаните и идните генерации.
„Се согласивме дека охридскиот регион има исклучителна универзална вредност и претставува богатство не само за Македонија, туку и за целото човештво“, порача Николоски.