Подготовката ќе ја врши стручен тим составен од рехабилитатор и едукатор, логопед, психолог, социјален работник и физиотерапевт.
Министетството за труд и социјална политика информира дека целта на предвидената индивидуална, групна и окупациска терапија на децата со попреченост е тие од најрана возраст да стекнат и да развиваат вештини за секојдневниот живот.
– Децата ќе ги учат навиките за исхрана, хигиена и за одржување на сопственото здравје, но ќе стекнуваат и воспитни, социјални, културни и рекреативни активности. Во Центарот ќе бидат организирани и советувања и работилници за помош на родителите на овие деца, соопшти МТСП.
Според министерката Јагода Шахпаска, преку Дневниот центар и најмалите реално ќе ги почувствуваат социјалните реформи што ги презема Владата.
– Целта на социјалната реформа е да се приближат социјалните услуги до корисниците, до граѓаните. Да се зголеми опфатот на граѓаните кои влегуваат во системот на социјална заштита, да се подобри квалитетот на социјалните услуги, а со тоа да се подобри и нивниот живот. Дополнително да се намали невработеноста и да се подобри животниот стандард на сите граѓани, рече министерката Шахпаска.
Како што соопшти МТСП, Шахпаска изрази задоволство што Општина Липково добива нов Дневен центар за деца со попреченост со капацитет за 38 на возраст од 2 до 14 години и нагласи дека суштината на ваквите реформи е да се поддржат ранливите категории, во овој случај – децата со попреченост.
Таа денеска на претставници на здружението „Имаго плус“ им ја предаде дозволата за вршење дејност од социјална заштита за услугата нега на деца со попреченост.
Градоначалникот на Липково, Еркан Арифи, рече дека како локална заедница се горди што ја преземаат одговорноста за грижата за децата со попреченост од нивната општина.
-Тие и нивните родители отсега нема да мора да патуваат до градовите за да ја добијат неопходната нега. Дополнително, ние најдобро ги познаваме специфичните проблеми со кои се соочуваат овие семејства, па верувам дека помошта што ќе ја добиваат во новиот Дневен центар во Оризаре ќе биде уште поквалитетна од таа што им беше достапна досега, рече градоначалникот Арифи.
Претседателката на Здружението „Имаго плус“, Земријет Бела Весели, рече дека постојано ги надградува вештините и стручноста во работата со децата со попреченост и нивните родители.
– Сигурна сум дека Дневниот центар и нашиот стручен тим ќе направат исчекор во квалитетот на услугата за децата корисници на услугите на Центарот. Дополнително, на нивните родители ќе им го пренесеме нашето знаење, сѐ со цел, нивните деца да постигнат што поквалитетен развој и подготовка за понатамошниот живот, истакна Весели.
Според координаторот на Дневниот центар, Аринета Нухија, „нема поголема привилегија од таа да му се помогне на оној кому таа помош му треба“.
– Кога станува збор за децата, возвратниот ефект е уште поголем, зашто најчесто пред вас се случува позитивен напредок кој го гледате и ве исполнува со радост и гордост. Со нетрпение ги очекуваме децата во Центарот, додаде Нухија.
Во рамките на Проектот за подобрување на социјалните услуги што го спроведува Министерството за труд и социјална политика, засега се поддржани 19 проекти во 24 општини. Најголем дел од овие проекти, односно 16, се наменети за помош и нега на стари лица во домот, а по еден се за помош на стари лица во дневен центар, за рехабилитација на деца со попреченост и проект за рехабилитација и реинтеграција на лица со попреченост во локалната средина.
– За давање на услугите обучени се 300 лица, а се очекува да бидат опфатени околу 900 корисници. Една од главните цели на социјалната реформа е услугите да им бидат полесно достапни и на корисниците од руралните и најоддалечени региони во државата, наведува МТСП.
Министерството за труд и социјална политика наскоро ќе објави нов јавен повик за дополнителни проекти за општините кои не успеале да аплицираат на првиот повик, а за таа цел континуирано се прави мапирање на потребите на граѓаните.