ВМРО-ДПМНЕ и ВРЕДИ на чекор до нова влада

Сѐ поблиску новата Влада предводена од ВМРО-ДПМНЕ и ВРЕДИ. Во текот на вчерашниот ден во 14 часот во просториите на ВМРО-ДПМНЕ се сретнале работните групи на двете коалиции.

Постулати за соработка

Постулатите за идна соработка се: Евроинтеграции, раст на економија и владеење на правото. Сѐ уште не се разговара за поделба на ресори и распределба на директорски места. Досега на лидерски средби се разговараше единствено за општите начела на соработка меѓу коалициите, а во следните денови се очекува овие работи да се конкретизираат.

Дали ЗНАМ ќе биде дел од новата влада?

Мицкоски најави дека коалицијата „Твоја Македонија“ предводена од ВМРО-ДПМНЕ веќе има 61 пратеник и дека во преговорите влегуваат со мнозинство. Неизвесно е дали во коалицијата ќе влезе и Максим Димитриевски и движењето ЗНАМ.

ВМРО-ДПМНЕ и Коалицијата „Вреди“ работат кон формирање на коалицискa влада – двете страни ја нагласуваат важноста од принципиелно држење до програмските цели кои добија поддршка од граѓаните на изборите

Поднесена тужба од коалицијата „Вреди“

До Управниот суд синоќа била поднесена тужба од коалицијата „Вреди“ за резултатите од парламентарните избори, против одлуката на Државната изборна комисија. Оформен е предмет, се преземаат сите процесни дејствија, согласно роковите определени во Изборниот законик, информираат од Управен. И од Демократската унија за интеграција велат дека доставиле тужби до Управниот суд по усвоените 7 приговори од Државната изборна комисија, шест во петтата изборна единица и еден во шестата изборна единица.

Евентуално прегласување во изборна единица 5 и 6

Од „Вреди“ сметаат дека прифаќањето на приговорите во петката и шестката е потврда на изборните манипулации на Европскиот фронт, предводен од ДУИ. Од таму пак возвраќаат дека тоа значело оспорување на нивниот легитимитет и волјата на гласачите. Од ДУИ најавија и пријави против членовите на ДИК.

Прегласување на 22 мај

Дали ќе има прегласување на 22-ри мај ќе зависи од одлуките на Управниот суд и од симулацијата на Државната изборна комисија дали може да влијае на освоените пратенички мандати. Според информациите, ако има гласање на 7-те избирачки места, теоретски е можно ВМРО-ДПМНЕ и коалицијата и ЛДП, партнер на СДСМ да добијат уште по еден пратеник, а ДУИ да загуби два. Управниот суд има 48 часа за да одлучи по приговорите. Решението е конечно. Како и во случајот со претседателските избори. Од Државната изборна комисија велат дека конечните, официјални резултати ќе ги соопштат веднаш или најдоцна за 24 часа по завршување на целата процедура.