Мицкоски шокиран од обвинувањата на СДСМ: „Имаме работа со партијата што 7 години не мрдна со прст за загадувањето – воздухот не може преку ноќ да се исчисти, но имаме стратегија“

Македонија деновиве се наоѓа меѓу најзагадените земји во светот, со концентрации на ПМ честички што ја надминуваат дозволената граница тројно, покажуваат податоците од светските платформи за мониторинг на квалитетот на воздухот. Во услови на драстично влошен квалитет на воздухот, политичките партии влегуваат во меѓусебни обвинувања, но резултати и понатаму нема, а граѓаните трпат.

СДСМ го обвинува премиерот за неактивност на Владата

Опозициската партија СДСМ упати критики кон премиерот и Владата, тврдејќи дека не е преземена ниту една конкретна мерка за намалување на загадувањето. СДСМ го потсети премиерот на неговото ветување за милијарда денари инвестиции за заштита на животната средина, прашувајќи каде се тие средства и зошто не се видливи во реални акции за почист воздух. Истовремено, СДСМ истакна дека ниту градоначалниците на ВМРО-ДПМНЕ не донеле резултати, иако ситуацијата е критична.

Мицкоски: воздухот нема да се исчисти преку ноќ

Премиерот Мицкоски изрази шокираност од обвинувањата на СДСМ, потсетувајќи дека оваа партија била седум години на власт, а според него, не презела ништо за да се реши проблемот со загадувањето. „Не може воздухот да се исчисти преку ноќ,“ рече Мицкоски, додавајќи дека Владата е во потрага по партнери за инвестиции во когенеративни системи за затоплување кои би помогнале да се намали загадувањето во иднина. Според него, овие решенија бараат време и постепено ќе покажат ефект во наредните три до четири години, бидејќи моменталната состојба е резултат на долготрајна запоставеност.

„Планираме неколку иницијативи кои би можеле да го намалат загадувањето за околу шеесет проценти, откако целиот систем ќе биде имплементиран, но веднаш резултати нема да има,“ објасни премиерот Мицкоски. „Може да потрае три до четири години од сега за да видиме значајни подобрувања. Да нагласам—воздухот нема да биде исчистен до следната недела, ниту постојат магични решенија. Ако почнеме со развој на решенија денес, како што веќе правиме, резултатите ќе ги очекуваме во следните неколку години.“

• ПРАЗНИ ЗБОРОВИ: Седум години трошеа милионски буџети и не направија ништо за намалување на загадувањето на воздухот – најавуваме системски пристап со фокус на екоиновации, велат од ВМРО-ДПМНЕ

СДСМ бара поддршка за амандман за нова депонија во Кочани

Опозициската партија СДСМ поднесе амандман за обезбедување на 30 милиони денари за изградба на нова привремена депонија, со цел затворање на постојната во Кочани. Од партијата побараа од мнозинството во Собранието да го поддржи амандманот, за да им се излезе во пресрет на барањата на локалните жители кои протестираат поради штетното влијание на постојната депонија врз квалитетот на воздухот.

Министерството за животна средина со најави за инспекциски контроли

Министерството за животна средина објави дека наскоро ќе започнат инспекциски контроли во индустриските капацитети, како дел од краткорочен и долгорочен план за намалување на загадувањето. Министерството најави дека планот ќе биде испратен до Владата на разгледување, за понатамошни активности кои би донеле видливи резултати на полето на заштита на животната средина.

Професори алармираат: ПМ честичките опасни и во затворени простории

Универзитетските професори преку истражување предупредија дека високото присуство на ПМ честички е штетно по здравјето, дури и во затворени простории. Во истражувањето спроведено во градинки и училишта во пет града во земјата, регистрирани се концентрации на ПМ честички во затворените простории кои се двојно над препорачаните граници, што ја зголемува загриженоста за здравјето на децата и сите граѓани кои се изложени на овие честички.