Серија скандали за криминалот на владата на Мицкоски, најави опозициската СДСМ. Тврдат дека фирмата со име „Дигитал оне“, формирана на крајот на август лани, со само двајца работници за една година, добила тендери од скоро 9 милиони евра, народни пари. Опозицијата постави низа прашања на прес-конференција: едно од нив: дали оваа фирма била блиска со поранешниот портпарол на ВМРО-ДПМНЕ, Димса Арсовски. Ги повикуваат истражните органи да отворат истрага.
Последниот договор е рамковна спогодба за софтверски лиценци за виртуелна платформа во вредност од 8 милиони евра. Како е можно за толку кратко време фирма со двајца вработени да добијат речиси 9 милиони евра? Ако ова не е класична шема за испумпување на парите на граѓаните преку фирми блиски до власта тогаш што е? И секако, едно од прашањата е дали Кристијан е во роднински врски со поранешниот портпарол на ДПМНЕ, Димса Арсовски? – прашуваат од СДСМ.
Експортпаролот на ВМРО-ДПМНЕ остро ги демантира обвинувањата на опозицијата за каква било поврзаност со фирмата која го добила тендерот. Ниту го познавам човекот кој е сопственик на фирмата, ниту сме во роднински врски одговара Арсовски и тврди дека единствено што е исто е презимето.
„Немам никаква врска со никаков тендер, ниту пак сум имал било каква врска со државни тендери. Иако во прашална форма, моето име и презиме беше споменато на пресот на СДСМ, тенденциозно со намера да ме вовлечат во нивни креатури и да ги манипулираат граѓаните и јавноста, па затоа јавно барам извинување од СДСМ, ако им остана малце достоинство. За разлика од нив, секој мој прес каде што било изнесено било што како информација, било точно и потврдено, а не како нивниве лаги и измислици. Знам дека се уште ги боли што ја изнесував секојдневно вистината за нивниот криминал,“ пишува Арсовски.
Арсовски јавно побара извинување од СДСМ бидејќки како што вели ова се лаги и измислици на опозицијата.