Министерот заедно со директорите на Јавните претпријатија за патишта, Рустеми и Ацевски и пратеничката Лолита Ристова, извршија увид во комплетната рехабилитација на патниот правец Неготино – Дуброво – Војшанци и притоа остварија средба и со локалното население.
Инвестицијата за рехабилитација на овој пат изнесува 75 милиони денари, средства обезбедени преку централната власт.
„Ме радува што денеска ги гледам жителите собрани во толкав број, тоа ми дава потврда дека нашите политики вродуваат со плод. Рехабилитацијата на овој патен правец беше големо барање на жителите од Дуброво и Војшанци и ние преку Министерството за транспорт и врски и ЈП за државни патишта обезбедивме 75 милиони денари за негова модернизација. Голема заслуга за целиот овој проект покрај директорите Рустеми и Ацевски, има и пратеничката Ристова, која беше во постојана комуникација со нас до негова целосна реализација. Во овој регион во тек е и реконструкцијата на автопатска делница Неготино – Демир Капија, инвестиција од 9 милиони евра, многу значаен проект за сите оние кои патуваат по Коридорот 10. Нашите активности продолжуваат во сите општини, модерна и безбедна патна мрежа останува наш примарен фокус.“ – изјави министерот Бочварски.
„Благодарност до министерот Бочварски и директорите Рустеми и Ацевски што имаа слух за барањата на жителите и го реконструираа овој многу значаен патен правец кој поврзува повеќе населени места. Поддршката од централната власт е добредојдена за целиот овој регион и очекувам да реализираме уште многу квалитетни проекти со кои дополнително ќе го подобриме квалтетот на живот на локалното население.“ – изјави пратеничката Ристова.
Директорите Рустеми и Ацевски истакнаа дека добрата соработка и комуникација помеѓу институциите е клучна во реализацијата на ваквите крупни проекти за граѓаните и нагласија дека градежната офанзива продолжува и во наредниот период.
Министерот Бочварски оствари и работна посета на локалната фабрика Интеркар Глобал, каде се сретна со заменик директорот Сефер Килич.
Претходно министерот Бочварски, заедно со директорите Рустеми и Ацевски и пратеничката Марија Костадинова, беа присутни во гевгелискиот регион каде извршија увид во рехабилитираниот патен правец кој го поврзува населено место Прдејци, со Коридорот 10.
Станува збор за инвестиција вредна 15 милиони денари, средства обезбедени од централната власт.
Министерството за транспорт и врски продолжува во реализација на инфраструктурната програма во изградба на квалитетна, модерна и безбедна патна мрежа низ целата држава, соопштуваат од Министерството.