ЕДНАКОВ ПРИСТАП ЗА СЕКОЕ ДЕТЕ: Македонија станува дел од Европската агенција за инклузивно образование

Секое дете мора да има еднаков пристап до квалитетно образование

Македонија станува земја членка на Европската агенција за посебни потреби и инклузивно образование (EASNIE), што се оценува како значаен чекор во унапредувањето на инклузивноста во образовниот систем.

Ова го истакна министерката за образование и наука, проф. д-р Весна Јаневска, на средбата со директорот на EASNIE, Жоао Коста, и Рута Сваринскаите, кои деновиве престојуваат во земјава.

– Размената на искуства и позитивни практики со земјите од Европа и светот ни е од голема важност и затоа се радуваме што стануваме земја членка на Европската агенција за посебни потреби и инклузивно образование, истакна Јаневска.

Фокус на еднакви можности и следење на европските трендови

Министерката нагласи дека Министерството континуирано работи на зголемување на инклузивноста во образованието, со јасна цел секое дете да има еднаков пристап до квалитетно образование.

– Постојано работиме на подигнување на инклузивноста на образовниот систем, затоа што секое дете мора да има еднаков пристап до квалитетно образование и можност да го достигне својот полн потенцијал, независно од комплексноста на посебните образовни потреби, рече Јаневска.

Таа посочи дека земјата има што да сподели со партнерите, особено поради чекорите што биле направени во изминатите години во насока на градење поинклузивно општество, но и дека ќе продолжи внимателно да ги следи практиките и трендовите што ги применуваат развиените земји.

Европска платформа за инклузивни образовни политики

Европската агенција за посебни потреби и инклузивно образование е независна организација која функционира како платформа за соработка меѓу земјите-членки со цел развој на поинклузивни образовни системи.

EASNIE е единственото европско тело финансирано од самите земји-членки, со јасна мисија да помогне во унапредување на квалитетот и ефикасноста на инклузивното образование за сите ученици.

Агенцијата е кофинансирана од министерствата за образование на земјите-членки и од Европската комисија, преку оперативен грант во рамки на програмата Еразмус+.