Предложено е електричната меѓусебна интерконекција Египет-Грција “ГРЕГИ” на групацијата Копелузос да биде вклучена во листата на проекти од заеднички интерес на Европската Унија.
Како што соопшти денес Генералниот директорат за енергија (ГД Енергија) на Европската комисија, електричната меѓусебна интерконекција ГРЕГИ е вклучена во листата на проекти од заеднички интерес (ПМИ). Ваквата листа ќе биде испратена до Европскиот парламент и до Европскиот совет за официјална ратификација со цел да се заокружи вообичаениот процес.
Овој водечки проект ќе ги поврзе Египет со Европа преку Грција со подморски кабел од 3 000 MW, со должина од околу 950 километри. Зелената и ценовно конкурентна енергија којашто ќе се пренесува од Египет во Грција ќе биде произведена од 9,5 GW обновливи извори на енергија коишто ќе бидат изградени и управувани од страна на Групацијата Копелузос во Египет. Овие 3 000 MW зелена енергија што ќе ги пренесе проектот ГРЕГИ, ќе заменат 4,5 милијарди долари природен гас годишно и ќе ги намалат емисиите на CO2 за околу 10 милиони тони годишно.
Ова е проект од стратешко значење за Европа, целосно усогласен со стратегијата на Европската Унија за транзиција кон зелена енергија и постигнување нула емисии на CO2 до 2050 година. Тој е целосно усогласен со енергетската стратегија на Европа за електрификација на енергетските системи и нивно снабдување со чиста зелена енергија, со оглед на брзиот продор на обновливите извори на енергија и декарбонизацијата на Унијата. Истовремено, ГРЕГИ ќе даде одлучувачки придонес во насока на енергетска диверзификација и силно ќе ја поддржи политиката на ЕУ за создавање зелени енергетски коридори од југ до север, поврзувајќи го египетскиот електричен систем со Европа.
Исто така, се истакнува дека ГРЕГИ – Зелениот енергетски интерконектор – веќе е вклучен во развојната иницијатива на Европската Унија „Глобална порта“ која има за цел да ги обедини приоритетите на надворешната политика и инвестициите на ЕУ за периодот 2021-2027 година, со цел развој на глобалната инфраструктура.