Европската комисија во средата покрена формална постапка против платформата Booking.com. Со постапката треба да се утврди дали Booking ги прекршил правилата од Актот за дигитални услуги (DSA), бидејќи не ги проценил внимателно и не ги намалил ефикасно ризиците од лажни огласи за сместување и фишинг-превари.
Како што се наведува во соопштението на Комисијата, истрагата опфаќа три области: лажни и нерегуларни огласи за сместување, фишинг-превари со злоупотреба на податоците за резервациите и гостите, како и платено истакнување огласи кои не се јасно означени како реклами.
Лажни сместувања и злоупотреба на податоци
Европската комисија ќе испита дали Booking.com правилно ги препознал и проценил ризиците од незаконска содржина на платформата. Во оваа категорија спаѓаат лажни огласи, непостоечки сместувачки капацитети, лажно претставување и понуди што ги прекршуваат прописите за заштита на потрошувачите. Ќе се испитува и дали платформата ги отстранувала ваквите огласи.
Посебно внимание ќе биде посветено на начинот на кој платформата ги споделува податоците за резервациите и гостите со издавачите на сместувачки капацитети. Комисијата сака да утврди дали постојат доволно заштитни механизми за да се спречи злоупотреба на овие податоци за фишинг и барање лажни уплати.
Фишингот претставува обид на измамници да извлечат чувствителни податоци од корисниците, најчесто преку лажни пораки кои изгледаат како да пристигнуваат од вистинска компанија.
Платено истакнување без ознака дека станува збор за реклама
Издавачите на сместувачки капацитети на Booking.com можат да платат повисока провизија за нивните огласи да бидат повисоко рангирани во резултатите од пребарувањето. Европската комисија се сомнева дека ваквите огласи не се јасно означени како реклами, што би претставувало прекршување на правилата за транспарентност.
„Европејците треба да можат да резервираат одмор без страв дека ќе бидат измамени“, изјави Хена Виркунен, извршна потпретседателка на Европската комисија за технолошки суверенитет, безбедност и демократија.
Според пишувањето на Ројтерс, истрагата е покрената по прелиминарната анализа на извештаите за процена на ризик што Booking.com ѝ ги доставувал на Европската комисија.
За завршување на постапката не е предвиден законски рок, а компанијата има можност да предложи обврски со кои би ги отстранила забелешките на Комисијата.
Доколку се утврди прекршување на Актот за дигитални услуги, на компанијата ѝ се заканува казна до шест проценти од вкупниот годишен светски промет.
Во мај 2024 година Европската комисија го класифицирала Booking.com како една од многу големите онлајн платформи. Овој статус подразбира најстроги обврски предвидени со Актот за дигитални услуги.
Booking.com е дел од американската компанија Booking Holdings.