Полицијата го пронашла 19-годишниот возач што вчера во Визбегово удрил во детски велосипед управуван од тригодишно девојче од Скопје и потоа го напуштил местото на несреќата.
Сообраќајната несреќа се случила на 19 јуни 2026 година, околу 19 часот, во селото Визбегово, Скопско. Според полициските информации, патничко возило удрило во детски велосипед што го управувало тригодишното девојче, по што возачот избегал.
Девојчето се здобило со тешки телесни повреди, кои биле констатирани во Комплексот клиники „Мајка Тереза“.
Денеска, 20 јуни 2026 година, полициски службеници од Одделението за увид на сообраќајни незгоди го пронашле возилото и го идентификувале возачот. Станува збор за патничко моторно возило „фолксваген голф“ со скопски регистарски ознаки, управувано од Џ.Б., 19-годишник од скопското село Добрино.
Над возилото биле извршени преглед и фотографирање, а со возачот бил извршен службен разговор.
Од полицијата најавуваат дека по целосно документирање на случајот ќе биде поднесен соодветен поднесок.