Го поздравувам постигнатиот договор за продолжување на два дена пауза во непријателствата меѓу Израел и Хамас. Уште еднаш ги повикувам терористите на Хамас да ги ослободат сите заложници земени за време на нивниот ужасен напад на 7 октомври, напиша претседателката на Европската комисија Урсула фон дер Лајен на платформата Икс.
Двете страни вчера се договорија за дополнителни два дена да го продолжат четиридневниот прекин на огнот што започна во петокот.
„Во изминатите четири дена, беше трогателно да се видат ослободени првите израелски заложници, заедно со заложниците од други националности. Го поздравувам и значителното зголемување на испораката на хуманитарна помош за палестинските цивили во Газа, овозможено со оваа пауза во непријателствата. Договорот го продолжува овој прозорец на надеж дозволувајќи им на повеќе цивили во Газа да имаат пристап до основната помош, истакна Фон дер Лајен.
Според неа, од денеска, Европската комисија организира воздушен мост, со 20 завршени летови кои донесоа речиси 900 тони многу потребни хуманитарни материјали во Газа преку Египет. А за оваа недела веќе се планирани дополнителни 4 летови.
„Им благодарам на сите вклучени страни во обезбедувањето на овој критичен нов договор. Конкретно, би сакал да им се заблагодарам на властите на Катар, Египет и САД за нивните неуморни дипломатски напори за постигнување на овој договор. Европската унија ќе продолжи да остане во блиски контакти со сите меѓународни партнери за да работи на постигнување политичко решение кое ќе обезбеди мирен соживот меѓу Израелците и Палестинците, врз основа на решението за две држави“, посочи таа.