„Со оглед на ситуацијата во енклавата Сеута, синоќа дадов инструкции веднаш да се зајакнат контролите на шпанската граница. Понатаму, ги активирам Граничните сили за брза интервенција за темелни проверки“, објави Нуњез на платформата Икс.
Во меѓувреме, најмалку 18 мигранти загинаа во обид да стигнат до Сеута, каде што Шпанија ја распореди армијата откако повеќе илјади луѓе од Мароко влегоа во шпанската енклава.
Лидерот на француската ултрадесничарска партија Национален собир и претседателска кандидатка Марин Ле Пен, исто така, побара построги гранични мерки, обвинувајќи ги шпанските власти дека го поттикнуваат мигрантскиот бран.
„Соочена со масовниот и координиран мигрантски бран во Шпанија, охрабрен од шпанската влада, Франција мора веднаш да ги засили граничните контроли. И во 2027 година, ќе го завршиме ова лудило со ограничување на слободното движење во шенген-зоната само на граѓаните на ЕУ“, напиша Ле Пен на Икс.
Претходно, Италија побара Шпанија привремено да биде исклучена од Шенген-зоната поради миграциската криза во Сеута.
Италијанската премиерка Џорџа Мелони вчера изјави дека Рим е подготвен да преземе итни мерки за заштита на границите и безбедноста на граѓаните, вклучително и суспендирање на Шпанија од шенген-зоната.
Поддршка за италијанскиот предлог денеска пристигна и од Финска. Шефицата на финската дипломатија, Мари Рантанен, ги повика сите европски земји да застанат зад иницијативата за привремено исклучување на Шпанија од Шенген.
„Шпанија целосно не успеа да ја заштити надворешната граница на шенген-зоната од нелегален влез. Не може да продолжи така“, објави Рантанен на платформата Икс.