Евроамбасадорот Дејвид Гир изјави дека слободата на медиумите и изразувањето е темелна вредност на ЕУ и камен темелник на демократијата. Гир, кој заедно со амбасадори од други земји членки на ЕУ е во посета на Охрид, не сакаше да ги коментира изјавите на премиерот Димитар Ковачевски и на лидерот на ДУИ, Али Ахмети, дадени за телевизиите Алфа и Телма, ниту го коментираше кратењето на буџетот на агенцијата МИА, поради што се преземени низа мерки, меѓу кои и затворање на дописничките места во странство.
„Нема да ги коментирам различните изјави на политичари и лидери, но дозволете ми да кажам дека слободата на медиумите и изразувањето е темелна вредност на ЕУ и нешто што одблиску го следиме. Слободата на медиумите е камен темелник на демократијата затоа што води сметка и обезбедува дека граѓаните се добро информирани и можат да носат добро информирани одлуки. Тоа значи дека од една страна медиумите се задолжени да направат таков тип на веродостојни и точни информации и треба да се стремат кон највисоките професионални стандарди, и од друга страна е важно слободата на медиумите да биде зачувана и да биде заштитена од влијанија и вмешувања и од каква било други дејствија кои може да ги натераат новинарите на автоцензура или да се плашат од нешто“, рече Гир.
Евроамбасадорот се наврати на одговорот за најважните прашања за ЕУ во однос на реформите и нашиот скрининг, потенцирајќи дека „и слободата на медиумите е едно од оние прашања кое навлегува во сржта на тоа што се нарекува фундаментални прашања” и е од големо значење за Брисел.