Следеле жртва до дворот на неговиот внук и го претепале до безсознание
Основното јавно обвинителство Скопје отвори истражна постапка против две лица на возраст од 39 и 31 година поради основано сомнение дека заедно извршиле кривично дело – Насилство, согласно член 386 став 6 во врска со ставовите 3 и 1 од Кривичниот законик. Настанот се случил на 24 јули во селото Орешани, каде што осомничените физички нападнале маж кој, според нив, украл лубеници од нивата на едниот напаѓач.
Жртвата следена, нападната и претепана со клешти
Како што наведуваат од обвинителството, двајцата со товарно возило го следеле оштетениот од Петровец до селото Таор, сè до моментот кога тој се паркирал во дворот на куќата на својот внук во Орешани. Набргу по тоа, напаѓачите го стигнале, го извлекле насилно од возилото и започнале да го удираат со тупаници и шамари по главата и телото.
Во еден момент, вториот осомничен извадил водоводџиски клешти од камионот и продолжил да го удира со нив, сè додека жртвата не паднала во безсознание. Како резултат на нападот, оштетениот добил тешки телесни повреди и е хоспитализиран на Клиниката за неврохирургија во животозагрозувачка состојба.
Притвор побаран поради сериозноста на делото
Со насилните дејствија, осомничените предизвикале чувство на страв и несигурност кај сведоците, особено кај внукот на оштетениот кој присуствувал на настанот. Ценејќи ја сериозноста на делото и ризиците по јавната безбедност, јавниот обвинител побара мерка притвор за двајцата напаѓачи од судијата на претходна постапка при Основниот кривичен суд Скопје.