ГОЛЕМА ПОЛИЦИСКА АКЦИЈА ВО СРБИЈА: Уапсени над 90 функционери, бизнисмени и полициски началници

Началникот на криминалистичката полиција, командантот на антитерористичката единица, сопственикот на белградската „Алта банка“ и поранешен министер за економија се најдоа меѓу уапсените лица во Србија по одржувањето на парламентарните избори на 25 октомври. Повикувајќи се на официјални податоци од српското МВР, медиумите објавија дека во првите две недели по гласањето се уапсени над 90 лица во неколку одделни истраги, меѓу кои има околу 20 полициски службеници.

Бранот апсења започна пред формирањето на новата влада, а предметите опфаќаат полициско насилство, изборен поткуп, сомневања за наместени јавни набавки и незаконско извлекување на пари од банкарски сефови. Заклучно со 11 ноември, во јавноста се објавени детали за 20 клучни осомничени лица, од кои седуммина се наведени само со иницијали.

Првиот осомничен е Марко Кричак, началник на Управата на криминалистичката полиција, кој беше уапсен на 1 ноември во рамки на предметот „Сењак“. Тој се сомничи за злоупотреба на службената положба во истрага за убиство во белградскиот ресторан „27“ и физичко насилство, а опфатен е и во случајот за малтретирање демонстранти во владината гаража.

Заедно со него е уапсен и Бошко Секуловиќ, началник на Службата за сузбивање криминал, под сомнение за злоупотреби во истата истрага во „Сењак“, по што на двајцата им е одреден притвор до 30 дена.

Игор Жмириќ, командант на Специјалната антитерористичка единица, е приведен под сомнение за учество во малтретирање и мачење демонстранти во гаражата на владата во август 2025 година, кога бил дел од единицата за обезбедување личности, по што на 6 ноември му е изречен 30-дневен притвор.

Сопственикот на белградската „Алта банка“, Давор Мацура, заврши во притвор на 2 ноември откако Јавното обвинителство за организиран криминал покрена истрага поради сомнение за неовластен влез во трезорот и изнесување на готовина од околу 45 милијарди динари, односно повеќе од 380 милиони евра.

Поранешниот министер за економија и некогашен директор на „Белградски електрани“, Раде Баста, беше уапсен на 11 ноември на аеродромот во Белград под сомнение дека одобрил неосновани донации со кои претпријатието е оштетено за 14,1 милион динари, а во истиот случај се приведени уште седуммина.

Вршителот на должност директор на притворската единица во Окружниот затвор во Белград, Милан Вуковиќ, е уапсен во предметот со Жмириќ поради малтретирање граѓани во гаражата на владата и испратен во притвор.

Родољуб Рончевиќ, кој раководел со затворот „Забела“, е лишен од слобода на 6 ноември под сомнение за изборен поткуп откако наредил делење цигари на осуденици со цел да обезбеди гласови на изборите.

Директорот на Републичкиот хидрометеоролошки завод, Југослав Николиќ, се наоѓа во притвор од 3 ноември поради сомневања за перење пари и конверзија на нелегално стекнат имот во вредност од 650.000 евра.

Во Војводина, покраинскиот секретар за социјална политика Предраг Вулетиќ и претседателката на комисијата Дијана Миловиќ се приведени за незаконска доделба на станбена помош во износ од 130,9 милиони динари.

Претседателот на Општина Инѓија, Марко Гашиќ, заедно со директорот на „Инѓија пат“ У. Т., завршија зад решетки поради местење на тендери за набавка на сообраќајна сигнализација.

За несовесно работење и оштетување на буџетот за 83 милиони динари е приведен Саша Билиновиќ, началник во градската управа на Нови Сад, додека директорот на новосадската гимназија Радивоје Стојковиќ се соочи со забрана за влез во установата поради неспроведување судски одлуки за враќање на работа на четворица професори.

Во предметот на Баста е уапсен и извршниот директор во „Белградски електрани“ Д. И., додека во случајот со „Алта банка“ приведени се директорот на одделот за трезор Г. М. и соработникот И. П., кои му овозможувале незаконски пристап на сопственикот до парите.

Меѓу приведените се и бизнисмените Д. Љ. и П. Б. поради финансиски малверзации и заем од 98 милиони динари со кои се купувале акции во холдингот „Центрославија“.

На листата осомничени се наоѓа и полицискиот службеник Н. П., кој е меѓу осуммината припадници на полицијата притворени поради сомнеж за нанесување смртоносни повреди и мачење на Далибор Драгијевиќ во полициска станица во Бор.