Регулативата предвидува можност за продолжување до крајот на месецот
Грејната сезона за централното парно греење во Скопје завршува на 15 април, во среда. Тоа се однесува на сите потрошувачи приклучени на системот за централно греење во градот.
Според важечката регулатива, грејната сезона трае до 15 април. Сепак, постои можност таа да биде продолжена до 30 април, доколку прогнозата за средната надворешна температура за наредниот ден е еднаква или пониска од 12 степени Целзиусови. Податоците за температурата ги обезбедува Управата за хидрометеоролошки работи.
Официјално, грејната сезона започнува на 15 октомври секоја година. Таа важи за сите корисници приклучени на системот за централно греење во Скопје, со кој управува АД ЕСМ.
Системот опфаќа околу 66.000 активни потрошувачи. Од нив околу 65.000 се домаќинства, додека над 1.000 се деловни објекти. Во оваа група се вклучени болници, здравствени домови, училишта и детски градинки.