Премиерот Ѓуро Мацут ја отвори владината седница посветена на иднината на Нафтената индустрија на Србија (НИС), на која присуствуваа претседателот Александар Вучиќ, претседателката на парламентот Ана Брнабиќ и директорите на сите јавни претпријатија. Состанокот беше свикан поради американските санкции што ја блокираат понатамошната работа на НИС поради мнозинското руско сопствеништво.
Министерката за енергетика Дубравка Ѓедовиќ-Хандановиќ истакна дека Србија се соочува со исклучително тешка ситуација и дека санкциите, кои стапија во сила на 9 октомври, бараат трајна промена на сопственоста, односно излегување на руските акционери. Таа нагласи дека резервите се стабилни, но дека е невозможно да се води ресорот додека НИС е под санкции, додавајќи дека е подготвена да поднесе оставка.
Претседателот Вучиќ потсети дека со месеци предупредувал на акумулација на проблеми. „Страдаме како трева при судир на слонови“, рече тој, нагласувајќи дека Србија ќе ги поддржи руските акционери во преговори со трета страна. Доколку не се постигне согласност за цената, државата е подготвена да им понуди повисока сума за да го откупи НИС. Вучиќ додаде дека се спротивставува на национализација и конфискација, но дека решение мора да се донесе во рок од една недела, бидејќи „без проток на нафта до 13 февруари сме во целосен колапс“.
На министерот за финансии Синиша Мали му наложи да резервира 100 милиони евра за дополнителни количини бензин и дизел и го замоли да не создава непотребна нервоза.
Санкциите на ОФАЦ кон „Газпром“ и „Газпром нефт“, кои поседуваат 56,2 проценти од акциите во НИС, резултираа со целосен прекин на протокот на сурова нафта кон Србија. Владата на Србија поседува 29,9 проценти, а останатите акции се во сопственост на мали акционери и вработени.