Изчезнато бебе пронајдено живо: 24 часа било закопано во кафез за кучиња во Јужна Каролина

Единаесетмесечно момче, кое било однесено од својот татко, е спасено откако било закопано живо во кафез за кучиња, по спроведена итна потрага, соопштија властите во Јужна Каролина.

Бебето, Коа Шарп, било пронајдено во вторникот попладне, „борејќи се за живот“, откако, како што се верува, поминало 24 часа закопано, изјави шерифот на округот Лексингтон, Џеј Кун.

Момчето било пронајдено завиткано во пешкир, сместено во кафезот и плитко закопано под земја во шумата. Тоа плачело, а шерифот, за време на прес-конференцијата во вторникот, опиша дека тоа бил „најрадосниот звук од плач на бебе што некогаш сте го слушнале“.

Според канцеларијата на шерифот на округот Лексингтон, властите започнале потрага по Коа и неговиот татко, 25-годишниот Мајкл Комер, во понеделникот попладне.

Како што наведе Кун, Коа бил оставен на чување кај таткото во домот на мајката, додека таа излегла да заврши некоја работа. Во домот требало да пристигне и друго лице задолжено за чување на детето, но до моментот на неговото пристигнување, таткото и синот веќе ги немало.

Службеници од округот Лексингтон го пронашле Комер доцна во понеделникот вечерта во областа Бејтсбург-Лисвил, но од Коа немало ни трага ни глас, соопштија властите.

Мајкл Комер е прикажан на фотографија направена при приведувањето, објавена од канцеларијата на шерифот на округот Лексингтон.

Според Кун, во потрагата по бебето се вклучил тим од речиси 100 припадници на службите за итни интервенции. Во вторникот попладне, додека пребарувале во близина на куќата на таткото на Комер, тие забележале „свежо прекопана“ земја, на околу 50 јарди (околу 45 метри) длабоко во шумата.

„Кога почнаа да проверуваат и да копаат, можеше да се слушне како малиот Коа плаче“, рече шерифот. „Како што можете да претпоставите, започна трка со времето; сите се упатија таму, обидувајќи се да го извлечат.“

Комер првично беше уапсен под обвиненија за провала и давање отпор при апсење, а властите, во соработка со канцеларијата на локалниот обвинител, работат на утврдување дополнителни обвиненија, изјави Кун.

„Сакаме да им се заблагодариме на сите и денес едноставно да се радуваме на фактот дека едно 11-месечно бебе е живо“, рече Кун.