Јапонија побара корекција на новата карта на светот усвоена од Обединетите нации, бидејќи спорните Курилски Острови на неа се прикажани во иста боја како Русија. Токио архипелагот го смета за дел од своите Северни територии и оцени дека ваквиот приказ е спротивен на официјалниот став на јапонската влада.
Новата карта, позната како проекција „Една Земја“, ги прикажува континентите во пореалистичен размер. На неа Европа, Северна Америка и Гренланд изгледаат помали, додека Африка е прикажана како поголема.
Генералното собрание на ОН минатиот петок гласаше за усвојување на новата карта, а Јапонија беше меѓу 164-те земји членки што ја поддржаа резолуцијата. Токио, сепак, дополнително реагираше откако беше забележано дека Курилските Острови се обоени во иста боја како територијата на Русија.
Портпаролот на јапонската влада Минору Кихара изјави дека картата содржи приказ што не е во согласност со позицијата на Јапонија.
– Испративме протест до операторот на веб-страницата на картата преку дипломатски канали и побаравме корекција на овој приказ – рече Кихара.
Тој не откри кога јапонската влада го забележала спорниот приказ, но нагласи дека земјата мора да спречи ширење заблуди во врска со нејзините територии и географски имиња.
Од Обединетите нации соопштија дека новата карта има цел да понуди попрецизен приказ на копнените маси во споредба со традиционалната Меркаторова проекција, која до неодамна се користеше како официјална светска карта.
Курилските Острови се вулкански архипелаг во Источна Азија, кој се протега во должина од околу 1.300 километри меѓу рускиот полуостров Камчатка и јапонскиот остров Хокаидо. Архипелагот ги разделува Охотското Море и Тихиот Океан.
Територијалниот спор меѓу Јапонија и Русија околу островите датира од крајот на Втората светска војна. Поранешниот Советски Сојуз ги окупирал островите во 1945 година и го протерал јапонското население од нив.
Односите меѓу Токио и Москва значително се влошија минатиот месец, откако рускиот претседател Владимир Путин ја оствари својата прва ненајавена посета на спорниот архипелаг.
Веднаш по посетата, јапонските власти го повикале рускиот амбасадор на разговор. Јапонската премиерка Санае Такаичи изјави дека посетата на Путин „ги повредува чувствата на јапонскиот народ“ и ја оцени како „целосно неприфатлива“.
Таа нагласи дека островите се „неотуѓив дел од јапонската територија, и историски и според меѓународното право“.
Москва возврати дека „категорично“ ги отфрла изјавите на јапонската премиерка, оценувајќи ги како „политички несоодветни, навредливи и, се разбира, правно неосновани“.