Проблеми со електричната енергија кај бунарите на Лепенец
Јавното претпријатие „Водовод и канализација“ – Скопје соопшти дека главната причина за синоќешниот прекин на водоснабдувањето во голем дел од градот се краткотрајни прекини во снабдувањето со електрична енергија во регионот кај бунарите на Лепенец. Овие прекини довеле до варијации на притисокот во пумпниот систем кој ја снабдува главната градска водоводна линија.
Два дефекти на главниот цевковод
„Како резултат на прекините на електричната мрежа, настанаа два дефекти истовремено – на главната водоводна линија Ф-600 и во шахта на линијата Ф-400 на еден од бунарите“, се наведува во соопштението. Овие дефекти предизвикале прекин на водоснабдувањето во повеќе скопски населби.
Брза интервенција и постепена стабилизација
Од претпријатието информираат дека екипите веднаш излегле на терен и интензивно работеле на санација на дефектите. „Водоснабдувањето постепено се стабилизира за да се избегнат нови дефекти и дополнителни оптоварувања на системот. Нашата цел е целосна нормализација во најкраток можен рок“, порачаа од ЈП „Водовод и канализација“.