Канадскиот премиер Марк Карни подготвува план за значително зајакнување на економските и политичките врски со Европската Унија, во обид да ја намали зависноста на Канада од Соединетите Американски Држави. Според „Волстрит џурнал“, иницијативата доаѓа во период кога Канада и САД се соочуваат со најтешкиот меѓусебен трговски конфликт во модерната историја.
Карни му наложил на својот специјален претставник за Европа да ги разгледа најамбициозните можни модели на соработка со ЕУ, кои нема да подразбираат полноправно членство на Канада во Унијата или приклучување кон нејзиниот единствен пазар.
Во текот на изминатите месеци канадскиот премиер приватно разговарал со речиси сите водечки европски лидери, меѓу кои и претставници на Франција, Италија, Германија и скандинавските земји. Главна тема на разговорите била можноста Канада и нејзините 41 милион жители да се поврзат поблиску со Европската Унија.
Според лица запознаени со разговорите, трговската војна со САД дополнително го забрзала свртувањето на Канада кон Европа. Во европските политички кругови земјата веќе почнала, делумно на шега, да се нарекува „најновата членка на ЕУ“.
Деталите за идната соработка сè уште се разработуваат во технички работни групи. Карни, сепак, им кажал на своите европски колеги дека целта е преориентирање на канадската економија и општество, кои во изминатиот половина век биле силно поврзани со САД.
Планираниот пресврт претставува обид на Канада да ја намали економската зависност од својот јужен сосед и дел од своите трговски, инвестициски и политички врски да ги насочи кон Европа.
Дополнителен поттик за ваквата политика дала и американската реторика за Канада како можна „51-ва федерална држава“. Отава тоа го сметала за уште една причина да побара посилни партнерства надвор од Соединетите Американски Држави.