Фудбалерите на Осасуна и Атлетик Билбао ремизираа со резултат 1:1 во возбудлив натпревар од 12-то коло на шпанската Примера. Гостите од Баскија беа многу блиску до триумф по погодокот на Нико Вилијамс во 85-тата минута, но Алехандро Катена успеа да донесе израмнување и вреден бод за домашниот состав во 90-тата минута.
Тимот на Атлетик Билбао се покажа како подобар противник на теренот во текот на вечерта. Баскијците ја погодија стативата уште во 39-тата минута по силниот удар на Берингер, а нивниот офанзивен труд конечно беше крунисан со погодок на пет минути пред истекот на регуларниот тек на натпреварот.
Браќата Вилијамс, Ињаки и Нико, тогаш организираа одличен и брз контранапад. Постариот брат Ињаки на настанот се запиша како асистент, додека помладиот Нико без грешка ја смести топката во мрежата за почетно водство на гостинскиот состав.
Сепак, Алехандро Катена се погрижи тоа да не остане победнички погодок за гостите. Дефанзивецот најдобро се снајде во гужвата во противничкиот шеснаесетник на баскискиот состав и прецизно ја заби топката директно под пречката.
По овој освоен бод, составот на Осасуна се наоѓа на 16-то место на прволигашката табела со вкупно 12 бода. Наспроти нив, тимот на Атлетик Билбао останува на седмата позиција на табелата со четири бода повеќе.