За само пет часа полицијата санкционирала 72 возачи на лесни електрични возила во различни делови од Македонија. Акциската контрола била спроведена вчера, во периодот од 17 до 22 часот, а покрај прекршоците со тротинети и други лесни електрични возила, биле регистрирани уште 260 сообраќајни прекршоци.
Контролата била насочена кон почитувањето на сообраќајните правила од страна на возачите на лесни електрични возила, соопшти Министерството за внатрешни работи.
Најголем број санкции биле изречени на подрачјата на СВР Тетово и СВР Битола, каде што биле казнети по 11 возачи.
Во Велес полицијата санкционирала осум возачи, додека во Куманово биле изречени седум санкции.
Дополнителни 20 возачи на лесни електрични возила биле санкционирани од Мобилната единица за безбедност на сообраќајот на патиштата.
Со тоа, во рамките на петчасовната акциска контрола биле санкционирани вкупно 72 возачи на лесни електрични возила.
Полицијата, паралелно со контролите на тротинетите, регистрирала и 260 други сообраќајни прекршоци.
Од МВР најавија дека засилените контроли ќе продолжат и во наредните денови и апелираа до сите учесници во сообраќајот да ги почитуваат сообраќајните правила и прописи.