Дури 70 отсто маржа е откриена кај одредени супермаркети и големи увозници на овошје и зеленчук, поради што осум компании заработија казна од Државниот пазарен инспекторат – 15 дена затворање и парични глоби.
Казни за маркети, увозници на овошје и 1 аптека
Како што денес на прес-конференција соопшти првиот човек на Државниот пазарен инспекторат, Влатко Стојкоски, инспекциите откриле еклатантно кршење на владините антикризни мерки за ограничување на маржите, поради што веднаш е изречена мерката привремено затворање од две недели и дополнителни парични санкции за сите прекршители.
– „Ова не е само непочитување, туку чиста алчност и профитерство. Кај дел од овие компании маржите достигнувале фрапантни 70 проценти. Покрај мерката затворање, следуваат и парични казни“, изјави Стојкоски.
Тој информираше дека инспекторите веќе обработуваат нови 30 предмети кои се однесуваат на големите маркети, а контролите на терен продолжуваат интензивно и во наредниот период.
– „Нашите инспектори континуирано се на терен. Никој нема да биде поштеден доколку го злоупотребува овој кризен период за лично богатење на грбот на граѓаните“, категоричен беше Стојкоски.
Инаку, во периодот од 24 февруари до 6 март, Државниот пазарен инспекторат извршил вкупно 429 контроли, од кои 365 во малопродажните и 64 во големопродажните објекти низ целата земја. Притоа откриени се 36 неправилности, а изречени се парични санкции со вкупен износ од над 42.000 евра.
Стојкоски оцени дека овие активности јасно демонстрираат цврста заложба на Владата за заштита на животниот стандард на граѓаните и испраќаат порака дека нема да биде толерирана злоупотреба на цените во време на криза.
И покрај овие исклучоци, според директорот на Инспекторатот, генерално гледано најголемиот дел од компаниите ги почитуваат мерките на Владата. Сепак, контролите ќе продолжат со истиот интензитет со цел целосно искоренување на огромните маржи и носење на соодветни казни за тие маркети