Десет отсто од капацитетот на приватните дата-центри во Русија ќе мора да бидат резервирани за потребите на државната информатичка инфраструктура. Рускиот претседател Владимир Путин потпиша указ со кој властите добиваат можност да го активираат резервираниот капацитет во рок од 24 часа, по серијата украински напади со беспилотни летала врз руски технолошки објекти.
Новата мерка ги обврзува сопствениците на приватните центри за податоци да издвојат десетина од расположливите капацитети за поддршка на функционирањето на руската информатичка инфраструктура. Целта на оваа одлука е државата да обезбеди брз пристап до дополнителни ресурси доколку постојните системи бидат загрозени или доколку се појави потреба од нивно пренасочување.
Путин му наложи на руското Министерство за дигитален развој, комуникации и масовни комуникации да изврши целосен попис на расположливите капацитети и простор во приватните дата-центри низ целата земја. Со указот се предвидува формирање специјална владина комисија која ќе одлучува кога резервираните ресурси треба да бидат ставени на располагање на државата.
Откако комисијата ќе донесе таква одлука, операторите ќе имаат рок од само 24 часа за да овозможат пристап до побараниот капацитет. Механизмот треба да им овозможи на руските власти брзо да обезбедат дополнителна инфраструктура за непречено функционирање на информатичките системи.
Одлуката доаѓа откако руските дата-центри во изминатите недели станаа директни цели на украински напади со беспилотни летала. Во текот на октомври биле погодени објекти со кои управуваат руските технолошки компании „Јандекс“ и „Сбербанк“.
Нападите ја зголемија важноста на резервните капацитети, кои би можеле да помогнат во одржувањето на работата на информатичката инфраструктура доколку дел од постојните објекти бидат оштетени. Указот исто така предвидува и можност за привремено користење дата-центри што се наоѓаат надвор од Русија, но за такви капацитети ќе биде потребно официјално одобрение од Федералната служба за безбедност (ФСБ).