Премиерот со обвинувања за блокади и порака дека земјата ќе биде најуспешна во европските извештаи
Премиерот Христијан Мицкоски денеска упати критики кон политички структури кои, како што рече, се обидуваат да го блокираат напредокот на државата. Тој порача дека, и покрај обидите за попречување, Македонија ќе продолжи да постигнува резултати на европско ниво.
„Истите тие кои ја крадеа, распродаваа и понижуваа Македонија, сега грчевито се борат да ја блокираат. Исплашени се дека, по декемврискиот извештај, сега и во јунскиот извештај на Европската комисија за напредокот на земјите од Западниот Балкан повторно ќе бидеме најдобри… Но, имам лоша вест за нив и нивните коалициони леви партнери: Македонија ќе ве победи вас и вашите блокади“, изјави Мицкоски.
Тој додаде дека земјата повторно очекува добри резултати во однос на европските извештаи и пристапот до фондовите.
Спор околу Изборниот законик и гласањето на дијаспората
Мицкоски се осврна и на измените на Изборниот законик, за кои рече дека со месеци биле усогласувани.
„Блокираат закон кој со месеци го договараа. Закон во кој им прифативме сѐ што предложија. Единственото нешто што побаравме е дијаспората да може да гласа по електронски пат уште на следните претседателски избори. Прво го прифатија, а денес го блокираат и бараат бледи алиби-аргументи“, рече премиерот.
Тој предложи и компромисно решение, повикувајќи на поднесување амандмани.
Повици за компромис и електронско гласање на дијаспората
Премиерот нагласи дека е подготвен да прифати корекции поврзани со технички прашања, доколку се постигне договор за останатите одредби.
„Ајде вака: предложете амандмани со кои барате корекција на начинот на заокружување и поднесување приговори. Веднаш ќе ви ги прифатиме. Повлечете ги другите амандмани и да го изгласаме Изборниот законик“, порача Мицкоски.
Тој додаде дека дијаспората треба да има можност за електронско гласање на следните претседателски избори.
„Нашата дијаспора има право да учествува по електронски пат на следните претседателски избори, во време кога во светот вештачката интелигенција ќе има клучна улога“, изјави премиерот.
Мицкоски порача и дека политичките актери имаат шанса да покажат вистинска посветеност на европската иднина преку реформи.