Претседателката на Европската комисија Урсула фон дер Лајен ги оцени како неприфатливи сцените од Сеута, каде што во последните 24 часа околу 49.000 мигранти од Мароко влегле по копно и море во шпанската енклава. Според шпанските медиуми, до денеска напладне околу 25.000 од нив веќе се вратиле во Мароко, додека најмалку 34 лица загинале обидувајќи се да стигнат до Сеута.
„Не можеме да дозволиме никому да дојде во нашата Унија без да ги почитува нашите правила. Опасните гранични преминувања мора веднаш да престанат. Мрежите за шверц на луѓе мора да бидат демонтирани. Враќањето на оние кои немаат право на престој мора да биде брзо, во согласност со нашите правила. На двајца комесари им доверив задача да помогнат во ставањето на ситуацијата под контрола“, објави Фон дер Лајен.
Таа соопшти дека еврокомесарот за внатрешни работи и миграција Магнус Брунер веќе соработува со шпанските власти и е подготвен да отпатува во најкритичните области. Европската Унија разгледува и дополнителна оперативна поддршка за Шпанија преку Фронтекс, додека потпретседателката на Европската комисија Дубравка Шуица е во контакт со мароканските власти.
„Тој ќе работи на обезбедување дополнителна оперативна поддршка за Шпанија, вклучително и преку Фронтекс. Потпретседателката Дубравка Шуица е во контакт со нејзиниот марокански колега. Убедена сум дека нашето тесно партнерство со Мароко ќе помогне да се постигнат конкретни резултати“, порача Фон дер Лајен.
Масовното пристигнување следува откако Врховниот суд на Шпанија пресуди дека мигрантите запрени на море при обид да стигнат до Сеута или Мелила не можат веднаш да бидат вратени во Мароко. Шпанскиот премиер Педро Санчез ситуацијата ја нарече „напад“ и најави дека Владата ќе работи на што побрзо враќање на лицата кои нелегално влегле во земјата.
Сеута се наоѓа на северниот брег на Мароко и е одвоена од копнена Шпанија со Гибралтарскиот Проток. Таа со години е една од главните точки преку кои мигрантите се обидуваат да влезат во Европската Унија.