Над 14.500 средношколци ќе полагаат државна, стручна и уметничка матура
Следната сабота стартува полагањето на екстерните испити од државната матура, на кои оваа година ќе учествуваат повеќе од 14.500 матуранти од целата држава. Согласно законските измени, учениците ќе полагаат три различни типа матурски испити – државна матура, државна стручна матура и државна уметничка матура.
Според податоците на Државниот испитен центар, вкупно 14.587 ученици се пријавени за полагање. Од нив, 12.184 ќе полагаат државна матура, 2.276 државна стручна матура, додека 127 ученици ќе полагаат државна уметничка матура.
Најголем број матуранти и оваа година избрале да полагаат англиски јазик како изборен екстерен предмет. Дел од учениците ќе полагаат и математика, историја, како и други странски јазици.
Испитите почнуваат на 6 јуни
Изборниот екстерен предмет е закажан за 6 јуни, додека задолжителниот испит по мајчин јазик и литература ќе се реализира на 11 и 12 јуни.
Од Државниот испитен центар информираат дека се направени сите подготовки за непречено и безбедно спроведување на испитниот процес.
За организацијата и надзорот на полагањето ќе бидат ангажирани околу 2.500 тестатори и дополнителни 200 набљудувачи.
Засилени мерки за фер полагање
Надлежните најавуваат засилени мерки за контрола и почитување на правилата за време на полагањето, со цел да се обезбеди фер процес за сите кандидати.
Годинашната матура ќе биде прва што целосно ќе се реализира според новите законски измени, со кои се воведоа посебни форми на матура за учениците од стручните и уметничките училишта.