Мисајловски: SEEBRIG е клучен инструмент за развој и безбедност на Југоисточна Европа

Куманово го прослави 26-годишниот успех на SEEBRIG

Во Куманово денеска се одржа свеченост по повод 26 години од формирањето на мултинационалната бригада SEEBRIG, која е клучна за регионалната безбедност и соработка меѓу земјите од Југоисточна Европа. Настанот го следеа високи претставници од земјите-членки, вклучувајќи ги началниците на Генералштабовите, а министерот за одбрана Владо Мисајловски ја потенцираше улогата на бригадата како инструмент за градење доверба и развој на капацитетите.

Министерот Мисајловски се обрати пред присутните и нагласи дека SEEBRIG, како една од најуспешните иницијативи во рамки на SEDM, се докажа како клучен инструмент за меѓусебно разбирање и развој на капацитетите на земјите членки.

„Работејќи заедно, рамо до рамо во регион кој секогаш се стреми кон мир, можеме да бидеме уште поефикасни во обезбедувањето безбедност и просперитет за граѓаните“, рече Мисајловски.

Тој додаде дека локацијата на Командата на Бригадата во Куманово во изминативе пет години е јасен показател за довербата во регионалната соработка.

Министерот истакна дека сите земји кои се дел од бригадата споделуваат стремеж кон мир и просперитет, што е особено значајно во време на геополитички промени и неизвесност.

„Мораме да одиме напред, да продолжиме да ја градиме нашата отпорност, нашите капацитети и нашето заедничко разбирање“, додаде Мисајловски.

Тој исто така изрази благодарност до досегашниот претседавач на Секретаријатот на SEDM, Симона Кожакару, и му посака успех на новиот претседавач, амбасадорот Елефтериос Ангхелопоулос.

Историја и активности на бригадата

SEEBRIG е формирана во 1998 година со потпишување на Договорот за мултинационална мировна сила во Скопје. Командата досега ротирала меѓу Пловдив, Констанца, Истанбул, Трнавас, Лариса и Куманово, а во 2026 година повторно ќе биде во Истанбул, Турција.

Во текот на 26 години, бригадата учествувала во бројни мировни мисии, вклучувајќи ја ISAF мисијата во Авганистан, каде презела команда над Кабулската мултинационална бригада. Дополнително, организирани се 14 биенални вежби „Seven Stars“, со учество на повеќе од 200 војници од девет земји, кои се најзначајни во регионот.