„Одредувањето датум ја принудува ЕУ да се подготви, а на Западен Балкан му дава специфична временска рамка за постигнување резултати од нивна страна. Јасно е дека ако не си поставиме цел, никогаш нема да бидеме подготвени“, изјави денеска Мишел во разговор со група дописници од Брисел.
Изјавата на Мишел од пред три дена на Бледскиот стратешки форум дека Европската унија треба да биде подготвена да прими нови членки до 2030 година наиде на голем одѕив во јавноста. Мишел истакна дека неговиот говор во Блед, во кој го спомена датумот, е резултат на многуте консултации што ги имал со лидерите на ЕУ и на Западен Балкан.
Како една од главните пречки за натамошното проширување на ЕУ, се наведува дека за сите важни одлуки потребно е да се добие едногласна согласност од сите земји-членки, што во голема мера го успорува и во некои случаи го блокира процесот на одлучување.
Исто така, се поставува прашањето дали правилото за едногласност може да се смени без промена на договорите според кои функционира ЕУ и дали Унијата воопшто може да се прошири без промена на тие договори.
Промената на договорот за ЕУ е многу долг процес кој лесно може да пропадне поради блокадата на која било земја членка, бидејќи сите тие треба да ја ратификуваат промената или во нивните парламенти или на референдум. Мишел вели дека ЕУ мора да одговори на три прашања пред да одлучи дали ќе продолжи со измените на договорите.
„Мораме да најдеме одговори на три прашања – што сакаме да постигнеме заедно, како ќе го спроведеме и како ќе платиме за тоа? Ако најдеме заеднички пристап за тие прашања, тогаш ќе видиме дали треба да го промениме договорот“, изјави дипломатски извор.
ЕУ мора да обезбеди нови финансиски средства за да може да прими нови членки. Истовремено, дипломатски извори посочуваат дека приемот на земјите од Западен Балкан, кои имаат вкупно 16-17 милиони жители, не би требало да биде проблем, но ќе биде многу потешко да се најдат нови средства за Украина.