Свечено поставување на темелникот во поранешната касарна „Илинден“
Камен-темелникот на новиот кампус на Универзитетот „Мајка Тереза“ денеска свечено ќе биде поставен на локацијата на универзитетот во поранешната касарна Касарна „Илинден“.
На настанот е најавено присуство на претседателот на Владата Христијан Мицкоски, кој ќе се обрати пред присутните.
Од Универзитетот соопштија дека на свеченоста ќе присуствуваат и министерката за образование и наука Весна Јаневска, ректорот на Универзитетот Беким Фетаји, како и првиот вицепремиер Беким Сали.
Меѓу присутните се најавени и градоначалникот на Чаир Изет Меџити, заменик-министерката за транспорт Калтрина Зеколи-Шаќири, како и претставници од академската заедница, државни институции и дипломатскиот кор.
Нов чекор за образовната инфраструктура
Од Универзитетот „Мајка Тереза“ наведуваат дека изградбата на кампусот претставува значаен чекор за развојот на образовната инфраструктура и научната дејност во земјата.
„Ова е значаен проект кој означува почеток на нова етапа за образовната инфраструктура и научната дејност во земјата. Изградбата на новиот кампус ќе послужи како мост помеѓу квалитетното образование и потребите на пазарот на трудот, обезбедувајќи современи услови за новите генерации студенти и истражувачи. Овој проект е доказ за нашата посветеност кон создавање средина каде што иновациите и професионализмот се во прв план“, наведуваат од Универзитетот „Мајка Тереза“.