Царините се очекувани, но има простор за договор
Премиерот Христијан Мицкоски изјави дека царините од 33 отсто што САД ѝ ги воведе на Македонија биле очекувани. Тој нагласи дека администрацијата на претседателот Доналд Трамп одамна најавила вакви мерки. Но ниту една европска држава не била подготвена за нив.
„Кога се појавува проблем, треба да седнеме на маса и да разговараме“, изјави Мицкоски во интервју за ТВ Алфа.
Предлог за договор за слободна трговија
Премиерот откри дека предложил потпишување на договор за слободна трговија со САД за елиминирање на царините. Според него, уште во јануари годинава, за време на средбата со тогашниот заменик на помошникот државен секретар на САД, Александар Касаноф, бил отворен дијалог во рамките на Стратешкиот дијалог меѓу двете земји.
„Наши институции веќе анализираат дали можеме да го реализираме овој договор во согласност со важечките трговски спогодби. Идејата е позитивно прифатена и во Вашингтон“, посочи премиерот.
Министерот за надворешни работи, Тимчо Муцунски, веќе одржал средби во Брисел на оваа тема со американскиот секретар за трговија, Хауард Лутник, како и со висок претставник на Белата куќа задолжен за Балканот.
Трамп воведува нови царини – трговска војна на повидок
Последици од американските царини
Мицкоски предупреди дека воведувањето на американските царини од 20% кон Европската Унија ќе има секундарни ефекти врз македонската економија.
„Во 2024 година, според Државниот завод за статистика, Македонија извезе стока во САД во вредност од 110 милиони евра, додека увозот изнесуваше 180 милиони евра. Сепак, годинава во јануари имаме суфицит – извезовме 21 милион евра, а увезовме 12 милиони евра“, објасни премиерот.
Тој нагласи дека најголем дел од извозот се однесува на автобуси произведени во Скопје од странски инвеститор, но бидејќи компанијата е регистрирана во Белгија, официјално се смета дека тие се со белгиско потекло.
„Очекувам ЕУ и САД да најдат решение преку дијалог и да се избегнат дополнителни негативни последици по македонската економија“, заклучи Мицкоски.
Извор: Курир