Најголемата меѓународна вежба досега со над 2200 војници започна со церемонија на армискиот полигон
Со свечена воена церемонија на армискиот полигон „Криволак“, денеска официјално започна најголемата меѓународна воена вежба во земјава. „Immediate Response 25“, дел од европската НАТО вежба „Defender 25“, која ќе трае до 9 јуни.
Во вежбата учествуваат над 2200 припадници на армиите од девет земји. Седум НАТО-членки и две партнерски држави: Македонија, САД, Албанија, Грција, Италија, Црна Гора, Обединетото Кралство, Австрија и Косово. Сите тие ќе демонстрираат современи одбранбени способности, вклучувајќи сајбер одбрана, АБХ-тактики, премин преку река и бојни гаѓања.
Силна поддршка и јасна порака на сојузништво
Церемонијата ја отвори бригаден генерал Мирче Ѓоргоски, командант на Командата за операции и домаќин на вежбата. Тој го нагласи значењето на вежбата за зголемување на интероперабилноста, тактичката координација и самоодржливоста на бојното поле.
„Immediate Response 25 претставува извонредна можност за проверка и унапредување на нашите способности како сојузници, во духот на заедништво и спремност. Како земја што одбележа пет години членство во НАТО, оваа активност има особено значење за Армијата и нејзините декларирани сили,“ изјави генералот Ѓоргоски.
Вежба со регионално и глобално значење
„Immediate Response 25“ се реализира како дел од широката НАТО иницијатива „Defender 25“, под водство на САД, чија цел е подобрување на борбената готовност и капацитетите за одвраќање низ југоисточна Европа. Покрај воените операции, посебен акцент се става на сајбер-безбедноста и технолошката координација меѓу армиите.
Завршниот тон го дадоа оркестрите
Свеченоста беше збогатена со настап на армискиот оркестар на Македонија и воениот оркестар од Вермонт, САД, кои изведоа дел од своите репертоари, симболизирајќи пријателство и културна соработка.
Извор: Миа