МВР ги зајакнува мерките за безбедност на Локалните избори
Министерството за внатрешни работи (МВР) на денот на Локалните избори 2025 континуирано презема активности за непречено и безбедно спроведување на изборниот процес. Полициските службеници ќе бидат распоредени во близина на избирачките места и на клучните сообраќајни точки за навремено откривање на можни нарушувања на јавниот ред и мир. Безбедноста на граѓаните ќе се гарантира со стандардни материјално-технички средства, мобилни тимови, пунктовско работење и употреба на дронови за воздушна контрола.
МВР апелира до граѓаните и политичките партии да придонесат за мирна и демократска атмосфера, да ги почитуваат упатствата на полициските службеници и да се воздржат од активности кои би го нарушиле изборниот процес.
Континуирано обезбедување на гласачките места
Полицијата ќе ги обезбедува гласачките места од 6:00 до 19:00 часот, како и по затворањето за време на сумирањето на резултатите. Таа го придружува избирачкиот одбор до предавањето на записниците и изборниот материјал до општинската изборна комисија или Изборната комисија на Град Скопје.
Избирачкиот одбор е задолжен за одржување на редот на гласачкото место и може да побара помош од полицијата за отстранување неовластени лица и пропагандни материјали во просторијата и во радиус од 100 метри околу гласачкото место. Гласањето може да се прекине само при нарушување на редот, временски непогоди или други вонредни околности. Ако прекинот трае подолго од еден час, гласањето ќе продолжи за времетраењето на прекинот, но не повеќе од три часа.
Исто така, полицијата ќе обезбедува доверливиот изборен материјал за цело време на изборниот процес, обезбедувајќи непречено гласање и сигурност на сите учесници.