По обвинувањата за полициско насилство врз двајца млади во Скопје на 7 октомври, Министерството за внатрешни работи отвори проверка за утврдување на сите околности на случајот, вклучително и на наводите за оштетување на нивното возило.
По информациите објавени во дел од медиумите за настанот што се случил на 7 октомври, министерот за внатрешни работи наложил Одделот за внатрешна контрола, криминалистички истраги и професионални стандарди да ги испита сите околности поврзани со случајот.
Демократската унија за интеграција (ДУИ) бара целосно расветлување на случајот со двајцата млади на возраст од 21 и 23 години, кои, според партијата, биле брутално малтретирани од полицијата. Од ДУИ бараат итна, непристрасна и транспарентна истрага, како и одговорност за секое евентуално прекршување на законите од страна на полициските службеници.