Собраниската комисија денес ќе ги испитува постапки на АНБ и АР
По растечките сомнежи за незаконско прислушкување во периодот од 2019 до 2024 година, претседателот на Собранието, Африм Гаши, за денеска во 11 часот закажа седница на Комисијата за надзор над работата на Агенцијата за национална безбедност и Агенцијата за разузнавање.
Од собраниската прес-служба информираат дека седницата ќе ја води пратеничката на СДСМ, Славјанка Петровска. Ова се случува откако пратеникот Љупчо Пренџов јавно побара итна седница, а претседателот на Комисијата, Скендер Реџепи, претходно изјави дека додека е претседател и дискриминиран нема да свика таков состанок.
– Целта е на седницата да се разгледаат загрижувачките сомнежи за незаконско постапување во АНБ, односно, да утврдиме точен датум за официјална посета во Агенцијата за национална безбедност преку која ќе извршиме директен увид во состојбите и темелно испитување на сите околности поврзани со овие настани, изјави Пренџов.
– Токму затоа, обврска на Комисијата е да делува одговорно и транспарентно, со цел да се обезбеди отчетност на институциите и заштита на нивниот интегритет и демократијата во државата, појасни Пренџов.
Реџепи истакна дека не може да присуствува на седницата бидејќи информациите се класифицирани, а тој сè уште нема добиено одговор на барањето за безбедносен сертификат од минатата година.
– Која би била логиката, претседателот на Комисијата да не може да присуствува на една таква Комисија или таков претрес во службите. Пред една година имам поднесено барање за безбедносен сертификат. Сметам дека тоа е дискриминација, истакна Реџепи.
Тој додаде дека претседателот на Собранието има можност да свика седница на Комисијата.