Двегодишно дете од Битола се здобило со тешки телесни повреди откако било нападнато од кучиња скитници додека си играло во близина на семејниот дом.
Инцидентот се случил вчера попладне, а случајот бил пријавен во СВР Битола од страна на лекар од Клиничката болница во градот. Според пријавата, детето било донесено на лекарска помош со сериозни повреди, кои настанале како последица на напад од повеќе кучиња без сопственик.
По укажаната првична медицинска помош во Битола, детето било итно префрлено во Комплексот клиники „Мајка Тереза“ во Скопје, каде што му е обезбедено понатамошно лекување.
Од Министерството за внатрешни работи информираат дека полициските службеници од СВР Битола преземаат мерки за целосно расчистување на настанот и утврдување на сите околности поврзани со нападот.
Случајот повторно го отвора прашањето за безбедноста во урбаните средини и проблемот со кучињата скитници, особено во близина на семејни домови и места каде престојуваат деца.