Народната банка донесе одлука за зголемување на основната каматна стапка за 0,25 процентни поени, односно од 4 на 4,25 отсто. Причина за ваквиот чекор се присутните инфлациски притисоци и геополитичката неизвесност, која и натаму претставува ризик за домашната економија.
Зголемена побарувачка на девизи
Одлуката била донесена на редовната седница на Извршниот одбор, одржана на 16 јуни 2026 година, врз основа на најновите економски показатели и процените за влијанието на глобалните случувања врз македонската економија.
Од почетокот на годината била забележана зголемена побарувачка на девизи од корпоративниот сектор, поради што Народната банка имала поголемо присуство на девизниот пазар. Од почетокот на мај, сепак, се забележува стабилизирање на побарувачката.
Инфлацијата во мај се намали на 4,8 отсто
Годишната стапка на инфлација во мај се намалила на 4,8 отсто, во споредба со 5,7 отсто во април, пред сè поради поумерениот раст на цените на храната.
Сепак, од Народната банка предупредуваат дека притисоците врз цените на енергенсите остануваат изразени и би можеле да влијаат врз останатите цени во економијата.
Девизните резерви остануваат во сигурната зона
Девизните резерви на крајот на мај достигнале 5,209 милијарди евра и, според централната банка, остануваат во сигурната зона. Во првиот квартал од 2026 година реалниот раст на бруто-домашниот производ изнесувал 3,1 отсто.
Од Народната банка оценуваат дека умереното затегнување на монетарната политика ќе придонесе за стабилизирање на инфлацијата, зачувување на стабилноста на девизниот курс на денарот и зацврстување на инфлациските очекувања.