Истражување покажува дека продуктивноста расте, но и притисокот врз вработените
Новите истражувања покажуваат дека употребата на вештачката интелигенција не води кон пократко работно време, туку кон зголемување на обврските. Наместо повеќе слободен простор, вработените сè почесто се соочуваат со проширен обем на работа и навлегување на работните задачи во текот на целиот ден.
Осуммесечно истражување спроведено во технолошка компанија покажало дека вработените доброволно ги прифатиле АИ алатките, но со тоа започнале да работат побрзо и да преземаат повеќе задачи. Наместо растоварување, тие го продолжиле работниот ден, при што продуктивноста се зголемила, но истовремено пораснале и когнитивниот замор и ризикот од професионално „прегорување“.
Три начини на зголемување на работниот притисок
Истражувачите издвоиле три главни механизми преку кои генеративната АИ го интензивира трудот.
Првиот е проширување на задачите, при што вработените со помош на АИ извршуваат активности што претходно не биле дел од нивната работна улога.
Вториот е бришење на границите меѓу работата и паузите, бидејќи леснотијата на користење ги поттикнува луѓето да проверуваат работни задачи и за време на одмор.
Третиот образец е засилен мултитаскинг, односно паралелно отворање повеќе процеси, што создава дополнително ментално оптоварување, иако на прв поглед изгледа како поголема ефикасност.
Потребни јасни правила за користење на АИ
Експертите посочуваат дека проблемот не е во самата технологија, туку во недостигот од јасни правила за нејзина употреба. Кога брзината станува главен критериум, се зголемува ризикот од намален квалитет на одлуките и од професионално исцрпување.
Поради тоа, се препорачува компаниите да воведат јасни „АИ практики“, кои ќе ги дефинираат границите на користење на алатките, ќе обезбедат време за преиспитување на одлуките и ќе го зачуваат просторот за директна комуникација меѓу луѓето.