Обвинителството во Белград побара Апелацискиот суд да ги зголеми казните за родителите на момчето кое во 2023 година го изврши масовното пукање во Основното училиште „Владислав Рибникар“, при што беа убиени 10 лица. Обвинителите сметаат дека првостепените пресуди не се соодветни и дека не ја исполнуваат целта на казнувањето.
Во 2024 година, Вишиот суд во Белград го осуди таткото на момчето, Владимир Кецмановиќ, на 14 години и шест месеци затвор, додека мајката Милјана Кецмановиќ доби казна од две години и 11 месеци затвор.
Обвинителството во жалбата побарало Апелацискиот суд да изрече максимални казни предвидени со закон – за Владимир Кецмановиќ затворска казна од 14 години и 11 месеци, а за Милјана Кецмановиќ три години затвор.
Според обвинителите, казните не биле правилно одмерени и не се доволни за да се постигнат целите на кривичната санкција.
Инструкторот од стрелиштето каде што таткото го обучувал својот син да ракува со оружје беше осуден на една година и три месеци затвор за лажно сведочење. По поднесената жалба, сепак, нему му е одреден домашен притвор.
Масовното пукање во училиштето „Владислав Рибникар“ се случи на 3 мај 2023 година, за време на првиот час од наставата. Тогаш момчето со пиштолот на својот татко уби осум ученици – седум девојчиња и едно момче – како и училишен обезбедувач. Во нападот беа ранети уште пет ученици и еден наставник.
Во моментот на нападот момчето имало помалку од 14 години, поради што според српското законодавство не можеше да биде кривично одговорно. По апсењето е сместено во специјализирана психијатриска установа, каде што и понатаму се наоѓа под надзор.
Покрај затворските казни, родителите се обврзани и на финансиски надомест. Според конечната пресуда на Вишиот суд, Владимир и Милјана Кецмановиќ треба заеднички да исплатат вкупно 344 милиони динари, односно околу три милиони евра, на име нематеријална штета на семејствата на убиените деца, наставничката Татјана Стевановиќ и двете ранети момчиња.
Во одделна постапка, судот одлучи Милјана и Владимир Кецмановиќ, заедно со нивниот малолетен син и училиштето, солидарно и поединечно да ѝ исплатат 6,9 милиони динари, односно околу 59.800 евра, на наставничката по историја Татјана Стевановиќ за претрпената душевна болка.
Во претходната пресуда против момчето Коста, судот оцени дека неговото дело било последица на сериозни пропусти во семејното воспитување, но и на изложеност на несоодветни содржини, вклучително и пристап до стрелиште.