Европската комисија до јуни ослободила 142,1 милиони евра во рамките на реформската агенда, соопшти Мицкоски на заедничката прес-конференција со евроамбасадорот Михалис Рокас. За време на обраќањето, Рокас го посочи Планот за раст како исклучителна можност за граѓаните директно да ги почувствуваат придобивките од европската интеграција уште пред официјалното членство.
„До јуни оваа година Европската комисија ослободила 142,1 милиони евра во рамките на реформската агенда“, рече Мицкоски.
Рокас оцени дека земјата значително го засилила својот ангажман во спроведувањето на Планот за раст и се профилирала како една од водечките според постигнатите резултати во реализацијата на реформската агенда. Притоа тој порача дека спроведувањето на клучните реформски чекори никако не смее да се одложува.
„Нема причина да се чека за да се спроведат тие реформи од кои што граѓаните секако имаат корист во планот за раст“, изјави Рокас.
Како директен практичен пример Рокас го посочи пристапувањето кон единствената европска зона за плаќање. Во истиот контекст од своето излагање тој ги спомена и поволностите во делот на роамингот како дел од процесот на постепена интеграција.
„Учеството на земјата во единствената зона за плаќање го отвора патот за побрзи парични трансфери, поголеми можности за постепена интеграција, како што е роамингот“, рече Рокас.
Евроамбасадорот притоа не прецизираше конкретни тарифи ниту временски рокови за роамингот. Неговата главна порака беше насочена кон тоа дека постепената интеграција може да обезбеди практични економски бенефити пред целосното зачленување во Унијата.
На крајот, Рокас додаде дека Европската Унија ќе продолжи редовно да обезбедува сеопфатна политичка, техничка и финансиска поддршка. Тој нагласи дека севкупниот напредок зависи исклучиво од реално остварените резултати во земјата и апелираше до сите политички чинители посветено да продолжат со реформите кои носат непосредна корист за сите граѓани.