Михајло Мудрик, украинскиот крилен напаѓач на Челзи, кој поради позитивен допинг-тест загуби речиси две години од својата кариера, за првпат јавно ја раскажа својата страна од приказната. Тој директно ја обвини украинската репрезентација и тамошната фудбалска федерација за случајот што му ја запре кариерата.
Во двочасовното интервју со новинарот Дмитриј Гордон на неговиот канал на Јутјуб, фудбалерот на Челзи, кој моментално настапува на позајмица во Тотенхем, зборуваше за сите околности поврзани со позитивниот наод на мелдониум, долгата суспензија, психолошките проблеми и милионските трошоци наменети за неговата правна одбрана.
Мудрик беше суспендиран од ноември 2024 до јули 2026 година. Челси го доведе во јануари 2023 година од Шахтјор во трансфер вреден 100 милиони евра, а последниот официјален натпревар пред почетокот на суспензијата го одигра во ноември 2024 година против тимот на Хајденхајм во Конференциската лига, каде што постигна погодок во победата од 2:0. Во дресот на Челси тој вкупно одигра 73 натпревари, постигнувајќи 10 гола со 11 асистенции.
Фудбалерот отворено ја обвини репрезентацијата за внесувањето на забранетата супстанца, тврдејќи дека пред позитивниот тест никогаш претходно немал слушнато за мелдониум. Тој е цврсто убеден дека супстанцата влегла во неговиот организам исклучиво за време на престојот со украинскиот национален тим.
„Станува збор за супстанца што може да се набави само во Источна Европа. Во мојот организам можела да влезе само на местото каде што престојував, а тоа е Украина. Во Англија нема такви супстанци“, изјави Мудрик.
Украинскиот новинар Игор Бурбас претходно изнесе теорија која стана централен дел од одбраната на фудбалерот. Според овие наводи, во ноември 2024 година за време на репрезентативниот собир, Мудрик поради непријатност при тренинзите примил инјекција со матични клетки за регенерација на ткивото. Главниот проблем во оваа теорија лежи во потеклото на клетките, кои наводно биле земени од крава што претходно била изложена на мелдониум.
Играчот дополнително откри како функционирале подготовките во репрезентацијата пред самите натпревари, посочувајќи дека нутриционистите редовно им делеле мешавини од таблети.
„Има нутриционисти кои ни даваат мешавина од таблети пред натпреварите. Само ги ставаат во чашка, а фудбалерите дури и не прашуваат што земаат“, раскажа Мудрик.
Запрашан директно дали ја смета украинската репрезентација за единствено одговорна за позитивниот допинг-тест, крилниот напаѓач категорично потврди дека токму тие ја сносат целосната вина.
Тој упати директни критики и кон претседателот на Украинската фудбалска федерација, Андриј Шевченко, истакнувајќи дека не добил соодветна поддршка, при што ја обвини организацијата за свесно протекување информации во јавноста.
„Ќе бидам искрен, се преправаа дека помагаат, но всушност немаше никаква помош. Создадоа повеќе проблеми отколку што решија. Ни го свртеа грбот токму кога помошта ни беше најпотребна“, изјави тој.
Сознанието за позитивниот наод исклучително тешко влијаело врз него, а веста лично му ја соопштиле претставници на Челси во неговиот дом. Мудрик призна дека шокот бил огромен поради тоа што имал сопствен нутриционист, личен готвач и максимално внимавал на својата спортска исхрана.
„Имаш чувство како во сон да паѓаш од облакодер. Во сонот се будиш кога ќе удриш во земјата, но во реалниот живот не се будиш, туку само продолжуваш да паѓаш. Тоа психички многу те погодува“, го опиша периодот по сознанието за позитивниот наод.
Тој не криеше дека по изрекувањето на суспензијата се соочувал со тешки моменти, често плачел и посегнувал по алкохол, пред целосно да сфати дека таквиот пат не нуди никакво решение за проблемот.
По завршувањето на двегодишната пауза, Мудрик ги одработи летните подготовки со Челси, по што премина на позајмица во редовите на Тотенхем. Пред реализацијата на овој потег остварил разговор со новиот тренер на Челси, Чаби Алонсо, кој инсистирал дека минутажата на теренот е од пресудно значење.
„Клубот има нов тренер, тој го гледа фудбалот на свој начин. Ми кажа директно: Подобро е да заминеш, да играш, да собереш минути и потоа да се вратиш во Челси. Сметам на тебе“, откри Мудрик.
И покрај огромната пауза и сите предизвици што му ја забавија кариерата, украинскиот фудбалер порача дека не се откажува од највисоките спортски цели и дека сè уште цели кон освојување на престижната „Златна топка“.
