Поранешниот претседател на Словенија, Борут Пахор изјави дека Косово мора да формира заедница на српски општини (ЗСО), но дека Србија, истовремено, мора да се сврти кон Запад.

Како што рече, на Косово треба да постои „некаква заедница“ бидејќи нејзиното формирање ќе ја зголеми довербата меѓу Косово и Србија.

Во разговорот организиран од Атлантскиот совет, Пахор рече дека отсекогаш го поддржувал дијалогот меѓу двете страни, за кој вели дека не е совршен, но дава резултати, пренесува Танјуг.

Тој посочи дека нема да се постигне добар конечен договор за Косово доколку властите во Србија и претседателот Александар Вучиќ бидат на страната на Москва.

„Сè ќе зависи од оценката на претседателот Вучиќ“, смета Пахор.

Од друга страна, тој наведува дека, доколку Србија се приклони кон европската страна, „порано или подоцна“ ќе биде постигнат некаков договор што ќе му обезбеди на Косово „некаков вид формална, дипломатска независност“.

Зборувајќи за ситуацијата на Западен Балкан поради руската инвазија на Украина, поранешниот словенечки претседател рече дека главното прашање е каде ќе биде Западен Балкан по завршувањето на конфликтот, нагласувајќи дека тоа најмногу зависи од одлуката на Србија. Тој додаде дека Западот треба да ја инспирира Србија да се оддалечи од Русија и да застане на страната на Западот „бидејќи тогаш целиот регион ќе биде на западната страна на поделената Европа“.

„Ако Србија ја избере Русија, тогаш мислам дека ќе се соочиме со некаква нестабилност во целиот регион во следните неколку години или децении“, рече Пахор.

Тој посочи дека не е само Србија да одлучи, туку и Европската унија мора да го интензивира процесот на проширување.

„Сега тоа е геополитичко прашање, а не само прашање на технички мерки“, рече тој.

Тој изјави дека за Србија е голем предизвик да донесе одлука на чија страна ќе биде во иднина.

„Не се работи само за пари и политичка волја, туку и за трпение од наша страна, да и дадеме време на Србија, чекор по чекор, да донесе одредени одлуки и конечно да се префрли на наша страна“, рече Пахор.

Тој додаде дека знае дека на Западот има недостиг од доверба кон властите во Србија, но посочува дека вреди да се биде трпелив и да се работи со Белград бидејќи се работи за мир и стабилност на Западен Балкан во наредните децении. .

„Многу е важно Вучиќ и владата во Србија да добијат некаква гаранција дека на крајот од европскиот пат Србија ќе стане полноправна членка на Европската унија бидејќи не сакаат да се случи Србија да оди на Европски пат, ја напушта Москва и на крајот не добива членство“, рече Пахор и наведе дека е неопходно да се инспирираат граѓаните на Србија за евентуално да се постигне консензус во Србија во следните неколку години.