Здравствени придобивки од редовното пешачење

Одењето е еден од најдостапните и наједноставните начини за физичка активност, а истражувањата покажуваат дека позитивно влијае на здравјето на срцето, крвниот притисок и психичкото здравје.

Според нови студии, пешачењето трипати неделно значително го намалува ризикот од болки во грбот. Истовремено, одењето 10.000 чекори дневно го намалува ризикот од срцеви заболувања, објави „Сајенс фокус“ (Science Focus).

Д-р Шарлот Хагерман од Истражувачкиот институт во Орегон, САД, нагласува:

„Одржувањето здрава исхрана во денешната средина бара постојан напор и самоконтрола. Создавањето рутини околу оброците може да го намали овој товар и да ги направи здравите избори поавтоматски.“

Калории, растојание и ефективност

Кога станува збор за согорување калории и слабеење, одењето генерално согорува помалку енергија од интензивни вежби како трчање или кревање тегови. Во просек, еден час умерено одење согорува околу 250 калории, според „Журналот за нутритивност“ (Journal of Nutrition).

И покрај тоа, пешачењето може да ја подобри ефективноста на диетата. Луѓе со прекумерна тежина кои пешачеле околу 2,5 часа неделно додека следеле диета, изгубиле повеќе килограми и телесни масти отколку оние кои само држеле диета.

Според списанието „Обесити“ (Obesity), учесниците во долгорочни програми за слабеење кои изгубиле над 10% од почетната тежина, правеле околу 10.000 чекори дневно на 6, 12 и 18 месеци. Тоа ја нагласува важноста на конзистентноста и редовноста на пешачењето.

Како да го направите пешачењето поефикасно

Темпото игра голема улога. Бавното одење се смета за лесна активност, додека умереното одење од околу пет километри на час е подобро за срцето, белите дробови и мускулите.

Зголемување на интензитетот преку замавнување на рацете, одење по нерамен терен, спротивен ветер или стрмнини значително го зголемува согорувањето калории. Истражувањата објавени во „Журналот за биомеханика“ покажуваат дека наклон од 5% ја зголемува енергијата што се троши за одење за 17%, додека наклон од 10% ја зголемува за 32%.

Дополнително, трендот на одење со тежина, преку носење ранец или елек, може да согори дополнителни 200 калории или повеќе на час. Пешачењето не само што помага за губење тежина, туку е и основа на физичката подготовка, вклучително и во воената обука.