Завршена постапката за избор на изведувач
По повеќе од една деценија застој, Скопје конечно ќе ја добие Универзалната сала во сјајот што го заслужува, истакна министерот за култура, Зоран Љутков. Тој додаде дека објектот ќе стане симбол на културата на нашиот град.
Вчера беше завршена постапката за избор на изведувач, со донесена одлука за најповолен понудувач по јавната набавка за реконструкција на објектот по принцип „Клуч на рака“. По завршување на законските рокови и потпишување на договорот, ќе започнат градежните активности.
Една година за откочување на процес долг 10 години
Министерот нагласи:
„Особено сум горд што за само една година успеавме да откочиме процес долг една деценија. Преземени се сите потребни мерки: нова проектна документација, измени на постојниот проект и обезбедување на предуслови за успешна реализација.“
Според него, Универзалната сала е симбол на Скопје, со досега над 5.000 реализирани настани и над 5.800.000 посетители. Сега повторно ќе стане центар за културни настани и собирање на граѓаните, како и дел од иницијативата „Скопје – Европска престолнина на културата 2028“.
Рок за реализација и благодарност до учесниците
Рокот за целосна реализација на реконструкцијата е предвиден до декември 2027 година. Министерот истакна:
„Благодарност до сите кои беа дел од процесот. Универзална сала повторно подготвена да го одбележи културниот ритам на Скопје.“
Со ова, Скопје наскоро ќе добие обновен културен симбол кој ќе ја зајакне позицијата на градот како центар на културните настани и меѓународни иницијативи.