Италијанската влада привремено го суспендира режимот на слободно движење во рамките на Шенген за воздушните и поморските врски со Шпанија и повторно воведе гранични контроли. Мерката е донесена по масовното пристигнување мигранти во шпанската енклава Сеута, а Италија дополнително ќе ги зајакне и контролите на копнената граница со Франција.
„Ова е вонредна мерка, донесена со цел да се заштити националната безбедност и да се спречат можните последици за нашата земја. Заштитата на нашите граници значи заштита на безбедноста на граѓаните, борба против илегалната миграција и насочување кон криминалните мрежи кои тргуваат со луѓе“, изјави италијанската премиерка Џорџа Мелони.
Одлуката била донесена по разгледувањето на најновите информации од Комитетот за имиграција и гранична безбедност, со кој во Министерството за внатрешни работи претседавал министерот Матео Пјантедози. По неговиот телефонски разговор со францускиот министер за внатрешни работи Лоран Нуњез, било договорено и засилување на контролите на границата меѓу Италија и Франција.
Мерките следуваат откако повеќе од 40.000 мигранти во последните денови влегле во Сеута од Мароко. Мелони претходно ги оцени снимките од енклавата како „шокантни“ и порача дека неконтролираната илегална миграција претставува закана за безбедноста на европските граници.
Франција во меѓувреме ги засили контролите на границата со Шпанија, додека повеќе европски претставници побараа Европската Унија да разгледа дополнителни мерки. Данската премиерка Мете Фредериксен повика да се разгледаат сите можности, вклучително и суспензија на делови од шенгенската соработка, а поддршка за построг пристап изразија и претставници од Австрија, Финска и Чешка.