Ако поројните врнежи што се прогнозираат за попладнево се случат за краток временски период, можна е појава на брзо истекување на водите по малите водотеци и суводолиците во планинските делови и региони, а доколку врнежите ги погодат градските средини можни се локални урбани поплавувања во зависност од капацитетите на атмосферските канализации и почитувањето на прописот атмосферските води да не се влеваат во канализациските мрежи, предупредува Секторот за хидрологија на УХМР.
– Иако кај поголемите реки не очекуваме големи покачувања на водостоите, предупредуваме на внимателно движење покрај водотеците и суводолиците поради можна појава на опасни води, појава на свлечишта и одрони, наведува УХМР.
Во рамки на Секторот за хидрологија се извршени согледувања на одредени прогностички модели и насоки за поројни поплави, достапни на хидролозите од УХМР. Од овие модели може да се утврди дека се можни врнежи на целата територија на државата со различен интензитет. Според моделот за врнежи ICON се очекува врнежи да има на западот, додека моделот NNM најавува врнежи во централните и источните делови од земјата и поинтензивни врнежи на северот и југот. Според FFGSystem-от (Сл.3) за поројни поплави, поројни врнежи се можни во делови од Шар Планина, Скопска Црна Гора, Осоговските Планини, Солунска Глава, Ниџе и Баба Планина и тоа во Тетовско, Скопско, Битолско, Кумановско, информира УХМР.