Посебен режим на сообраќај во Скопје поради Задушница

Од утринските часови ќе важат нови сообраќајни правила

Поради верскиот празник Задушница, денеска во Скопје ќе биде воведен посебен режим на сообраќај околу неколку гробишта, со цел безбедно и непречено движење на возилата и граѓаните.

Од Единицата за безбедност на патниот сообраќај при СВР Скопје информираа дека мерките ќе започнат да важат од 06:00 часот.

Кај градските гробишта „Бутел“ сообраќајот ќе се одвива кружно и во една насока. Возилата ќе се движат по улицата „Бутелска“, потоа лево по „Александар Урдаревски“, лево по „Боца Иванова“ и десно кон влезот на гробиштата.

Излезот од гробиштата ќе биде организиран преку улицата „Боца Иванова“, потоа до кружниот тек на „Бутелска“, па лево по истата улица и десно по „Кемал Сејфула“.

Посебен режим и кај Камник, Драчево и Ѓорче Петров

Измени во сообраќајот ќе има и околу гробиштата Камник, како и во Драчево и Ѓорче Петров.

Од МВР посочија дека, доколку има потреба, посебниот режим на сообраќај ќе продолжи и во сабота и недела, односно на 30 и 31 мај.

Министерството апелира граѓаните да ги почитуваат насоките и наредбите на полициските службеници на сообраќајниците каде што ќе важат измените.